‘ග්‍රැමර්’ පුළුවන් ‘ස්පෝකන්’ බෑ..

මා නිකවැරටිය ප්‍රදේශයේ විදුහලක විදුහල්පති ලෙස සේවය කරමින් සිටින අතර වාරයේ දිනක දිග කලිසමක් හැඳ ගත් සිහින්, මිටි සිරුරක් ඇති කාල වර්ණ පුද්ගලයෙක් විදුහලට පැමිණියේ ය. මා කතා කිරීමට පෙර මෙම පුද්ගලයා “සර් මට රස්සාවක් නෑ.‍ ඉංග්‍රීසි ඩිප්ලෝමා සහතිකයක් තිබෙනවා. ඔබ තුමාගේ විද්‍යාලයේ ඉංග්‍රීසි උගන්වන්න හදලා දෙන්න යැයි පැවසීය. මේ වනවිට විදුහලේ ඉංග්‍රීසි ඉගැන්වීමට ගුරු භවතකු නොසිටි බැවින් මාද මෙම පුද්ගලයාගේ ඉල්ලීමට එකඟ වීමි. ගුරු මණ්ඩලයට දැක්වූ විට ඔවුන් ගේ ද කැමැත්ත පළ විය. වැටුප කීයක් බලාපොරොත්තු වන්නේ දැයි ඇසූ විට ඉංග්‍රීසි මහතා මාසයකට කීයක් හරි දෙන්නැයි පැවසී ය.

“එහෙම නම් ඔබගේ ලිපිනයත් සහතිකයේ පිටපතකුත් දී යන්න, පැමිණීමට දිනයක් දන්වන්නම්” යැයි මම පැවසීමි. ඉංග්‍රීසි මහතා පිටත්ව ගියේ ය. පිටස්තර පුද්ගලයකුට ඉංග්‍රීසි ඉගැන්වීමට සැලැස්වීම සඳහා ඉහළින් අවසරයක් ගත යුතු යැයි සිතූ මම කලාප අධ්‍යක්ෂතුමා හමුවීමට ගොස් විදුහලේ ඉංග්‍රීසි ඉගැන්වීමට ගුරු භවතකු නොමැති බවත් ස්වේච්ඡාවෙන් වාගේ ඉංග්‍රීසි කිරීමට පුද්ගලයෙක් අසා ඇති බවත් ඒ සඳහා ඔබ තුමාගේ අවසරය ලබාදෙන ලෙසත් පැවසීමි. මෙහිදී කලාප අධ්‍යාපන අධ්‍යක්ෂතුමා තමාට නෛතික වශයෙන් ඉංග්‍රීසි ඉගැන්වීමට පිටස්තර පුද්ගලයකුට අවසරයක් දිය නොහැකි බවත් පාසල් සංවර්ධන සමිතිය සමඟ සාකච්ඡා කර ප්‍රායෝගික වැඩපිළිවෙළක් සකස්කර ගන්නා ලෙස කියා සිටියේ ය. ඉන්පසු මාද අධ්‍යක්ෂ තුමාගේ ප්‍රකාශයට සෑහීමට පත්ව විදුහලට පැමිණ ගුරු මණ්ඩලයේ ද කැමැත්ත ඇතිව පාසල් සංවර්ධන සමිතියේ විශේෂ ‍රැස්වීමක් සතියේ දිනක පැවැත්වීමි. ‍එම රැස්ව‍ීමේ දී සිද්ධිය ප්‍රකාශ කිරීමෙන් පසු සතුටට පත් දෙමවුපියෝ ඉංග්‍රීසි උගන්නවා ගැනීමට සමිතියෙන් මාසිකව මුදලක් ඉංග්‍රීසි මහතාට දීමට කැමැත්ත ප්‍රකාශ කළහ. මේ අනුව ඉංග්‍රීසි මහතාට විදුහලට පැමිණීමට දිනයක් දැන්වීමි. මම ඔහුට අනුකම්පා කර ගමේ පාසලේ නැවතී සිට වියදමක් නැතිව විදුහලට පැමිණීමට කටයුතු ද සැලසීමි. තවත් සහයෝගයක් ලෙස මාගේ පා පැදිය ද ඉංග්‍රීසි මහතාට ගමනට ලබා දුනිමි.

දැන් ඉංග්‍රීසි මහතා විදුහලට පැමිණ ඉංග්‍රීසි ඉගැන්වීම කරගෙන යයි. දිනක් මම පංතිය අධීක්ෂණයට ගියෙමි. ඉගැන්වීම අධීක්ෂණය කරමින් මම “මේ ළමයින්ට ඉංග්‍රීසි කතා කිරීමට ටිකක් පුරුදු කරන ලෙස ඉංග්‍රීසි මහතාට පැවසිණි. එවිට ඉංග්‍රීසි මහතා මා අමතා නිහතමානීව ඇඹරෙමින් මෙසේ ප්‍රකාශ කෙළේ ය.

“සර් මට ග්‍රැමර් (ව්‍යාකරණ) නම් පුළුවන්. “ස්පෝකන්’ නම් (කතාව) බෑ” එවිට මම සිනාසී ඉංග්‍රීසි මහත්තයාට ග්‍රැමර්, ස්පෝකන් දෙකම පුළුවන් විය යුතුනෙ යැයි කීවෙමි. එවිට කිසිවක් නොදොඩා ඉංග්‍රීසි මහතා නිශ්ශබ්ද විය. මාගේ මේ ප්‍රකාශයට දෝ ඉංග්‍රීසි මහතා පසුදින සිට විදුහලට නොපැමිණියේය. සොයා බැලීමේ දී මාගේ පාපැදියත් ඩැහැගෙන පාසලේ ස්වාමීන් වහන්සේටත් නොකියාම ඉංග්‍රීසි මහතා මාරු වී ඇති බව දැන ගන්නට ලැබිණ. මෙම සිද්ධියෙන් මම විමතියටත් කලකිරීමටත් පත්වීමි.

මෙය දැනට දශක තුනකට පමණ පෙර වූ සිද්ධියකි.

ඒ.ඇම්. නවරත්න බණ්ඩා-නිකවැරටිය

Leave a Reply

Your email address will not be published. Required fields are marked *